Се чини скоро неверојатно што првиот пробив на Аријана Гранде во поп светот се случи пред половина деценија. Првиот албум „Yours Truly“ ја претстави во музичкиот свет во 2013 година, а во 2018та година стигна до 4-то издание со албумот „Sweetener“. Во меѓувреме нејзината кариера и имиџот во јавноста поминаа низ еден куп драматични пресврти, повеќе од кој било друг поп изведувач во изминатава деценија.
Делумна причина за ова забрзано темпо е што кога започна музичка кариера, веќе беше позната, како дел од неколку детски серии на ТВ каналот Nickelodeon. Откако навлезе во музичкиот свет, за брзо време со редица хитови успеа да се етаблира како едно од најинтересните поп имиња на својата генерација.
И покрај големиот успех, може да се каже дека албумот што го издаде во изминатата 2018та година, „Sweetener“ претставуваше нов пресврт и нов врв во нејзината кариера. За да се разбере албумот, не може да не се спомне претходната пауза која го инспирираше: терористичкиот напад на нејзиниот минатогодишен концерт во Манчестер. Во меѓувреме и се случи и најдраматичната љубовна приказна до сега: брзинска свршувачка со комичарот Пит Дејвидсон. Двојката кон средината на годината најави дека планира да стапи во брак по само неколку неделна љубовна врска, за пред крајот на годината врската да биде раскината.
На Sweetener доминираа овие два пресудни моменти со 13 песни кои ги објаснуваат фазите на вљубување – воедно и заљубување во себеси.
За секој нов албум на Аријана Гранде се вели дека е „најсозреана до сега“, но „Sweetener“ беше поегзистенцијален дури и од нејзиниот „највозрасен“ албум, „Dangerous Woman“ од 2016 година. Во најавниот сингл „No Tears Left To Cry“ зборуваше за новосоздадената љубов кон себеси, но ги откри и проблемите со кои се соочувала до тој пат.
И на новиот проект Гранде соработуваше со шведскиот продуцент Макс Мартин, негови се 5 од песните, но на овој албум шаренило носи и продукцијата на Фарел Вилијамс, кој стои зад 7 песни. Кај Мартин има строга униформираност и тој е одговорен за „No Tears“, како и за „God Is A Woman“ и за третиот сингл од албумот, „Breathing“.
Сепак, главниот момент дојде со песните на Фарел. Како обожавателите реагираа на промената што тој и ја наметна, веројатно најмногу ќе се забележа по реакцијата кон песната „The Light Is Coming“, на која гостува Ники Минаж. Едни беа воодушевени како чудна нова насока, а други останаа малку резервирани поради ритамот како од цртан филм и семплуваните вокали.
„The Light Is Coming“ е најнеобична од сите песни на Фарел, но и останатите знаат да понудат дополнителен квалитет. Меѓу поинтересните беа љубовните “Blazed” и “R.E.M.,” како и соработката на гранде со Миси Елиот, “Borderline”. Последната песна, која исто е продуцирана од Фарел, “Get Well Soon” е интересна соул балада која потсетува на песните од деби албумот “Yours Truly”.
Повеќе навараќање кон нејзината поранешна R&B ориентација се чувствуваше во соработката со нејзиниот долгогодишен продуцент Томи Браун, “Better Off”, на која пее за згодно момче со половина срце.
Со начинот на пишување и неколку потенцијални хиотви, “Sweetener” на Аријана Гранде стана успешно враќање и среќен крај на една од приватно најтешките години за неа. Тоа што меѓу песните има искачувања и падови се забележува дека е подготвена да епсериментира и да ризикува со својата музика. Најнеобичните песни на албумот не се прифатливи за сите, но претставуваат знак дека Гранде се уште се гради како уметник. Оваа година се докажа дека безвременски глас како нејзиниот заслужува и соодветни текстови и продукција.
25.12.2018